Þing og þjóðfundur

Menntaskólinn í Reykjavík.

Sýning í Menntaskólanum við Lækjargötu um þingið og þjóðfundinn.

Þegar hið endurreista Alþingi Íslendinga tók til starfa sumarið 1845 var aðeins eitt hús í bænum sem gat rúmað starfsemi þess, en það var hið mikla hús Lærða skólans sem þá var í smíðum við Lækinn. Þar fór þinghaldið fram annað hvert sumar, allt til ársins 1879, alls 18 þing, eitt þeirra var Þjóðfundurinn sem haldinn var 1851. Jón Sigurðsson sat öll þingin nema fjögur.

Þinghaldið fór fram á hátíðasal skólans og önnur þingstörf í skólastofum og á Langalofti, sem var svefnloft skólapilta, en þar fóru þingveislur einnig fram. Sýningin bregður ljósi á starf þingsins í skólahúsinu og þingsalurinn verður opinn gestum til skoðunar.

Sýningin er á forræði undirbúningsnefndar og hluti af stærra miðbæjarverkefni, Jón Sigurðsson og Reykjavík, sem er unnið í samvinnu við Reykjavíkurborg og Árbæjarsafn.  

Sýningin verður opnuð laugardaginn 18. júní 2011 og stendur í tvo mánuði.

Þjóðfundurinn 1851. Hluti af málverki Brynjólfs Þórðarsonar frá 1932. Listasafn Íslands.